Þín eigin bókasafnsráðgáta
Morgunkorn októbermánaðar var tileinkað sýningunni „Þín eigin bókasafnsráðgáta“ sem nú stendur yfir í Gerðubergi. Þær Svanhildur Halla Haraldsdóttir og Embla Vigfúsdóttir tóku á móti okkur og sögðu frá undirbúningi sýningarinnar sem hafði tekið þær aðeins nokkra mánuði að setja upp. Markmiðið var að reyna að endurnýta allt efni sem unnið var með og annars hefði verið hent sem og að reyna að höfða til sköpunarkrafts og fróðleiksþorsta barna í umhverfi þar sem ævintýraþrá og hugrekki er virkjað.
Fengu þær marga bókakassa að gjöf sem þær gátu nýtt að vild og þær sögðu að það hefði verið ákveðinn þröskuldur að stíga yfir að nota bækur sem hráefni til að byggja með, búa til myndaveggi úr og skúlptúra.
Afraksturinn er meðal annars veggur sem líkist helst hlöðnum torfvegg og A laga tjald sem börn geta skriðið inn í auk þess sem marga veggi prýða blaðsíður úr teiknimyndasögum, matreiðslublöðum og bókum og mörgu fleiru.
Ráðgáturnar eru þrjár og þeim er ætlað að höfða til þátttakenda á öllum aldri. Ævintýraráðgátan er fyrir börn frá sex ára aldri, þá er Vísindaráðgátan betri fyrir stálpuð ungmenni frá tólf ára aldri og hentar vel að fleiri vinni að lausn hennar saman og loks er það Hrollvekjuráðgátan, sem er einnig ætlað að höfða til ungmenna frá tólf ára aldri „sem þora að flækja hlutina“. Morgunkornsgestir voru mjög hrifnir af hugvitsseminni og listfenginu sem einkennir þessa sýningu og vill Upplýsing hvetja alla til að fara á heimasíðu Borgarbókasafns og bóka tíma fyrir sig og börn og/eða barnabörn í þessar skemmtilegu ráðgátur áður en jólaösin tekur völdin.